መጽሔት የማሳተምና የማስቀጠል ዓላማው ከውስጣቸው ያልወጣው ጥቂት የቀድሞው ፓሮሲያ መጽሔት አዘጋጆች ሥራውን እንደገና ዐቀዱ፤ ወቅቱም ሰኔ 2010ዓም ነበር። በውይይቱ ላይ ዋናው አጀንዳ ሆኖ የቀረበው “ፓሮሲያ ለምን ከሸፈች?” የሚል ግምገማ ማካሄድ ነበር፡፡ በወቅቱም ከሁሉም ተግዳሮቶች ልቆ በዋንኛነት የወጣው ወጪው ጉዳይ ነበር። ምክንያቱም ማተሚያ ቤቶቹ ለማተም ከሚያወጡት በትንሹ ከዕጥፍ በላይ ያተርፋሉ። እዚያ ወጪ ላይ ትርፍ አስቦ፣ ሸጦ፣ መጽሔቱን ማስቀጠል የማይታሰብ እንደሆነ ለመረዳት ተቻለ። ስለዚህ የራሳችን ማተሚያ ቤት ሳይኖረን ወደ መጽሔት ኅትመት ድጋሚ መግባት ለተመሳሳይ ኪሣራ የሚዳርግ እንደሆነ ውሳኔ ተደረሰበት።

ማተሚያ ቤቱን ለመመሥረት የሚያስፈልጉ ወጪዎችን አስመልክቶ የተደረገው ጥናት ያመላከተው ነገር የመነሻ ወጪው እጅግ ከፍተኛ እንደሆነ ነው። በመሆኑም ይህንን ለማሳካት ከምንም ተነስቶ ማተሚያ ቤት ለመመሥረት ገንዘብ ማሰባሰቡ ለሰሚው አሳማኝ ያልሆነና አድካሚ አካሄድ ሆኖ ስለተገኘ መጽሔት በማተም ሥራ ውስጥ መግባትና በተጓዳኝ ማተሚያ ቤቱን መመሥረት እንዲሠራበት እንደ አማራጭ ቀርቦ ተወሰነ።

ከዚህ ውሳኔ በኋላ ፈታኙ ጉዳይ የመጽሔቱ ስም ማን ይሁን የሚል ነበር። ፓሮሲያ በሕዝቡ ዘንድ የሠረጸና የሚታወቅ በመሆኑ በዚያው እንቀጥል የሚለው አንዱ ሃሳብ ነበር። ሌላው ደግሞ ፓሮሲያ አሁን ሌላ አገልግሎት በመሆኑ ከዚያ ጋር ስሙ ይወዛገባል፣ ስለዚህ በአዲስ ስም መጀመር ነው ያለበት የሚል ነበር። ሁለተኛው ሃሳብ አሳማኝ ሆኖ በመገኘቱ ስም ማሰባሰብ ተጀመረ። ከተሰበሰቡት 22 ስሞች “ጊዜው” የሚለው የላቀ ብልጫ በማግኘቱ ከመስከረም 2010 ዓም ጀምሮ ጊዜው መጽሔት መታተም ጀመረ።

የጌታችንና የመድኃኒታችን ክርስቶስ የምድር አገልግሎት ወደመጠናቀቂያው ሲቃረብ ደቀመዛሙርት ወደ እርሱ ቀርበው ስለ ዳግም ምፅዓቱና ስለ ፍጻሜ ዓለም ጠይቀውት ነበር። መድኃኒዓለምም ሁኔታውን በዝርዝር ካስረዳቸው በኋላ የምፅዓቱን ቀንና ሰዓት ማንም እንደማያውቅ በመንገር ይህንን እንዲያደርጉ አሳሰባቸው፤ “ስለዚህ ጊዜው መቼ እንደሚሆን አታውቁምና ተጠንቀቁ፤ ትጉ፣ ጸልዩም” (ማርቆስ 13፡33)።

ይህንን የጌታ ቃል መሠረት በማድረግ እና የዘመኑን ፍጻሜ በመረዳት የመጽሔታችንን ስም “ጊዜው” በማለት ሰይመን ለንባብ መብቃት ችላለች። ለዚህ ሁሉ ስብሃት ለአብ፤ ስብሃት ለወልድ፤ ስብሃት ለመንፈስ ቅዱስ ይሁን! አሜን!